चितवन, भदाै २६ । चितवनको भरतपुर महानगरपालिका–९ बसन्तचोकमा कारमा आगलागी हुँदा एक जनाको मृत्यु भएको छ। जिल्ला प्रहरी कार्यालय चितवनका अनुसार बिहीबार बिहान करिब ६ बजे पूर्व–पश्चिम राजमार्गको सर्भिस लेनमा पूर्वबाट पश्चिमतर्फ आउँदै गरेको बा.प्र. ०१–०३० च ५५७९ नम्बरको कारमा अचानक आगलागी भएको हो।
आगलागीको जानकारी पाएलगत्तै घटनास्थलमा पुगेको प्रहरी टोलीले दमकलको सहयोगमा आगो नियन्त्रणमा लिएको थियो। आगो नियन्त्रणमा लिएर कारभित्र हेर्दा हालसम्म नाम, थर र ठेगाना नखुलेका एक जना पुरुष/व्यक्ति जलेर मृत अवस्थामा फेला परेको प्रहरीले जनाएको छ।आगलागीका कारण कारमा समेत पूर्णरूपमा क्षति पुगेको छ। मृतकको पहिचान तथा आगलागीको कारणबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।
