रत्ननगर, बैशाख ३० । रत्ननगर खानेपानी तथा सरसफाई उपभोक्ता संस्थाको नवनिर्वाचित कार्यसमितिले पदभार ग्रहण गरेलगत्तै उपभोक्तालाई लक्षित गर्दै महशुल तथा नयाँ धारा जडानमा भारी छुटको घोषणा गरेको छ।
संस्थाको सातौं अधिवेशनबाट निर्वाचित नयाँ कार्यसमितिको मिति २०८३ वैशाख २९ गते बसेको पहिलो बैठकले उपभोक्तालाई प्रत्यक्ष राहत पुग्ने गरी विभिन्न सहुलियत दिने महत्त्वपूर्ण निर्णय गरेको हो। संस्थाका अध्यक्ष दिपकराज पौडेलद्वारा वैशाख ३० गते जारी सूचना अनुसार सम्पूर्ण उपभोक्ता वर्गलाई छुटबारे जानकारी गराइएको छ।
यस्ता छन् सहुलियत तथा छुटका व्यवस्थाहरू:
महशुलमा छुट: आगामी २०८३ जेठ महिनामा हुने मिटर रिडिङको महशुलमा प्रत्येक उपभोक्तालाई न्यूनतम रु. ८०/- छुट दिइने निर्णय भएको छ।
नयाँ धारा जडानमा आधा छुट: नयाँ खानेपानीको धारा जडान गर्न चाहने नगरवासीका लागि २०८३ जेठ १ गतेदेखि लागू हुने गरी एक महिनासम्मका लागि जडान शुल्कमा ५० प्रतिशत (आधा) छुट दिइनेछ। जसअनुसार साबिकमा रु. ८,५००/- लाग्ने जडान शुल्कमा अब एक महिनासम्म भारी छुट पाइनेछ।
भूमिहीनलाई विशेष सहुलियत: संस्थाले भूमिहीन उपभोक्ताहरुलाई लक्षित गर्दै उनीहरुका लागि तोकिएको धारा जडान शुल्क रु. ४,२५०/- मा पनि थप ५० प्रतिशत छुट दिने निर्णय गरेको छ।
नयाँ नेतृत्व आएसँगै गरिएको यस जनमुखी निर्णयले रत्ननगरका हजारौं उपभोक्ता लाभान्वित हुने र स्वच्छ खानेपानीमा विपन्न तथा सबै वर्गको पहुँच पुग्न मद्दत पुग्ने विश्वास लिइएको छ। तोकिएको समय (जेठ महिनाभर) भित्र यस छुट सुविधाको लाभ लिन संस्थाले सम्पूर्ण नगरवासी तथा उपभोक्ता वर्गमा अनुरोध गरेको छ।
