रत्ननगर, जेठ १९ । रत्ननगर नगरपालिका वडा नं. २ ले मातृ–शिशु स्वास्थ्यलाई प्राथमिकतामा राख्दै नवप्रसूती महिलाहरूलाई लक्षित पोषण सामग्री वितरण गरेको छ।
वडाले जन्मदर्ता अभिलेखको आधारमा पछिल्लो चरणमा सूचीकृत १२ जना सुत्केरी महिलालाई पोषणयुक्त खाद्य पदार्थ हस्तान्तरण गरेको हो। वडाध्यक्ष राजेन्द्र प्रसाद घिमिरेका अनुसार, स्वास्थ्य निगरानीसहित सञ्चालन गरिएको यस कार्यक्रममा प्रत्येक सुत्केरीलाई दुई केजी नौनी घ्यू, एक क्रेट अण्डा र दुई केजी प्रोटिनयुक्त मिक्स गेडागुडी प्रदान गरिएको हो।
“सुत्केरी अवस्थामा महिलालाई आवश्यक पोषण तत्वको कमी हुन नदिन तथा नवजात शिशुको समुचित हेरचाह सुनिश्चित गर्न वडाले यो कार्यक्रम सुरु गरेको हो,” वडाध्यक्ष घिमिरेले बताए।
उनका अनुसार वडाले मातृ तथा शिशु स्वास्थ्य प्रवर्द्धन गर्ने उद्देश्यसहित आगामी दिनमा समेत यस्ता कार्यक्रमलाई निरन्तरता दिने तयारी गरिरहेको छ।
