रत्ननगर, जेठ १२ । चितवनको पर्यटकीय नगरी सौराहामा यही जेठ १७ गते रत्नज्योति इन्द्रेणी दोहोरी साँझ हुने भएको छ ।
वडा नं २ टाँडी स्थित रत्नज्योति क्लवले आयोजना गरेको उक्त कार्यक्रममा इन्द्रेणीका कृष्ण कँडेल सहितका कलाकारहरुले दोहोरी प्रस्तुत गर्ने छन् ।
आयोजकले सोमबार पत्रकार सम्मेलनको आयोजना गरी कार्यक्रमको उद्देश्य र तयारीको बारेमा जानकारी दिएको छ । रत्ननगर नगरपालिका संरक्षक रहेको उक्त कार्यक्रम दिउसो २ बजेबाट सौराहा सभाहलमा सुरु हुने क्लवका अध्यक्ष रामबहादुर बर्तौलाले जानकारी दिए ।
असहाय बृद्घा र अपाङ्गता भएका व्यक्तिहरुको सहयोगार्ग कार्यक्रम आयोजना गरिएको उपाध्यक्ष गोकुल पराजुलीले जानकारी दिए ।
सौराहाको पर्यटन विकास, संस्कृति संरक्षण र सौराहा सभाहलको प्रचारप्रसार गर्ने थप उद्देश्य रहेको उनको भनाई छ ।
कार्यक्रममा ७ लाख ४० हजार खर्च हुने अनुमान गरिएको छ । तीन लाखको टिकट विक्री गर्ने लक्ष्य रहेकोमा अहिले सम्म दुइलाखको टिकट विक्री भएको छ । २ हजार, एक हजार, ५०० टिक शुल्क निर्धारण गरिएको छ ।
क्लवका सहसचिव महेन्द्र घिमिरेले क्लवले स्थापनाको छोटो समयमै राउटेलाई सहयोग, बृक्षारोपण, बृद्धबृद्धा सम्मान, तिज गीत, शिवालय मन्दिरमा महायज्ञ, देउसी भइलो, वडा नं २ को सहयोगमा व्यामिनेटन कोर्ड र सरसफाइ कार्यक्रम गरेको जानकारी दिए ।
कार्यक्रमबाट बचत भएको रकम मानवीय सेवामा खर्च गर्ने गरि दोहोरी साँझ आयोजना गरिएको सचिव रामचन्द्र बजगाईले जानकारी दिए ।
