काठमाडौँ, भदौ २६ । सुशीला कार्कीलाई अन्तरिम सरकारको प्रधानमन्त्री बनाउने रस्साकस्सी चलिरहेका बेला नेपाली सैनिकको मुख्यालय जंगी अड्डा क्षेत्रमा जेन-जी र सञ्चारकर्मीको ठूलो भिड लागेको छ।
सेनाको मुख्य गेटबाहिर सयौँ जेन-जी तथा नेपाली र भारतीय सञ्चारमाध्यमका पत्रकार जम्मा भएका छन् ।
अहिले जेन-जीले ७३ वर्षकी सुशीला कार्कीलाई स्वीकार्न नसकिने भन्दै नाराबाजी गरिरहेका छन् ।
अर्कातिर नेपाली सञ्चारकर्मीले भारतीय सञ्चारकर्मीविरुद्ध पनि नाराबाजी गरेका छन् । जेन-जीले युवा पुस्ताबाटै प्रधानमन्त्री चाहिने जिकिरसहित चर्को नाराबाजी र वादविवाद गरिरहेका छन् ।
जेन-जी र पत्रकारको ठूलो भिड जम्मा भएपछि बुधबार रातिकै शैलीमा अहिले पनि सेनाले माइकिङ गरिरहेको छ ।
ठूलो भिड जम्मा भएपछि सैनिक मुख्यालय वरिपरि सेनाले कडाइ गरेको छ । केही युवाले सुशीला कार्की मान्दैनौँ नाराबाजी र विरोधसमेत गर्दैछन् ।
त्यसपछि सेनाले अनावश्यक भिड नगर्न भन्दै मुख्यालयको गेट परिसर र धरहरा अगाडि भेला भएकाहरूलाई माइकिङ गरेर हटाउने काम गरिरहेको छ ।
