रत्ननगर, भदाै ९ । कालिका नगरपालिका वडा नं. ७ मा रहेकाे जुटपानी प्रहरी चौकीमा प्रहरी निरीक्षक मनिष श्रेष्ठले जिम्मेवारी सम्हालेका छन् ।
श्रेष्ठलाई नगर प्रमुख विनोद रेग्मी, उपप्रमुख बिमला तामाङ, जिल्ला प्रहरी कार्यालय चितवनका प्रमुख प्रहरी उपरीक्षक गोबिन्द पुरी, ईलाका प्रहरी कार्यालय टाँडीका प्रमुख प्रहरी नायब उपरीक्षक रञ्जन अवा, वडा अध्यक्षहरू, विभिन्न राजनीतिक दलका प्रतिनिधि तथा सरोकारवालाको उपस्थितिमा एक समारोहका बीच पदस्थापन गरिएको हो ।
शान्ति–सुरक्षाको आवश्यकता र स्थानीयको मागअनुसार कालिका नगरपालिकाको पहलमा सो चौकीलाई ईलाका प्रहरी कार्यालयमा स्तरवृद्धि गर्ने प्रक्रिया अघि बढाइएको छ। अबदेखि प्रस्तावित इलाका प्रहरी कार्यालयको जिम्मेवारी प्रहरी निरीक्षक स्तरका अधिकृतले निर्वाह गर्नेछन्।
४६ वर्षअघि स्थापना भएको कालिका नगरपालिकाको जुटपानी प्रहरी चौकी अब इलाका प्रहरी कार्यालयमा स्तरवृद्धि हुने भएको छ।
इलाका प्रहरी कार्यालयका लागि आवश्यक मापदण्ड पूरा गर्ने प्रक्रिया सुरु भइसकेको र यसले कालिका क्षेत्रमा शान्तिसुरक्षा थप प्रभावकारी हुने अपेक्षा गरिएको छ।
