रत्ननगर, असार २० । रातको समयमा खोलामा माछा मार्न गएका एक व्यक्तिको गोहीको आक्रमणबाट मृत्यु भएको छ । चितवन सौराहा नजिक चित्रसारी बुढीराप्ती खोलामा बिहीबार राति उक्त घटना भएको हो । मृतक रत्ननगर नगरपालिका–८ का २६/२७ वर्षीय अविषेक माझी रहेका छन् भन्ने जानकारी चितवन जिल्ला प्रहरी कार्यालयले दिएको छ ।
अविषेक र सोही ठाउँका ४०/४५ वर्षीय राजकुमार माझी बिहीबार राति ९ बजेतिर माछा मार्न बुढीराप्ती खोलामा गएका थिए । माछा मार्दै गर्दा अविषेकलाई गोहीले तानेर खोलामा लगेको जानकारी राजकुमारले अस्थायी प्रहरी पोस्ट मैनाहालाई दिएका थिए ।
राति ९ बजेर ३५ मिनेटतिर खबर प्राप्त भएलगत्तै मैनाहा र रत्ननगर इलाका प्रहरी कार्यालयको टोली खोजी तथा उद्धारमा खटिएको चितवन जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) रवीन्द्र खनालले बताए । राति १ बजेर २० मिनेटतिर अविषेकको शव फेला परेको उनले जानकारी दिए ।
घटनास्थलभन्दा २०० मिटर उत्तरतर्फ माझीको शव फेला परेको डीएसपी खनालको भनाइ छ । बुढीराप्ती खोला दक्षिणतर्फ बग्ने भए पनि गोहीले तानेर नदीको उल्टो धारतर्फ अविषेकलाई लगेको उद्धारमा खटिएको प्रहरी अधिकारीले बताएका छन् ।
