जेठ २६ । आइतबार म्युनिखमा भएको फाइनल खेलमा स्पेनलाई पेनाल्टी सुटआउटमा ५-३ गोलअन्तरले हराउँदै पोर्चुगलले युइएफए नेसन्स लिगको उपाधि जितेको छ।
अतिरिक्त समयमा २-२ गोलको बराबरीमा खेल टुङ्गिदा रुबेन नेभेसले पोर्चुगलको जितका लागि विजयी पेनाल्टी किक प्रहार गरे। पेनाल्टीमा स्पेनका लागि अल्भारो मोराटाले मौका गुमाएपछि रुबेन नेभेसले स्पटबाट गोल गर्न सफल भए।
डिएगो कोस्टाले अल्भारो मोराटाको पेनाल्टी सुटआउट बचाएपछि डिफेन्डिङ च्याम्पियन स्पेनमाथि ऐतिहासिक जित निकाल्दै पोर्चुगल दुई पटकको नेसन्स लिग विजेता बनेको हो।
त्यसअघि स्पेनका लागि मार्टिन जुबिमेन्डी र मिकेल ओयारजाबालले गोल गरेपछि पोर्चुगलका लागि क्रिस्टियानो रोनाल्डो र नुनो मेन्डेसले बराबरी दुई गोल फर्काएका थिए।
खेलको अन्त्यमा कप्तान क्रिस्टियानो रोनाल्डोका आँखा खुशीको आँसुले भरिएका थिए। घाइते भएर मैदानबाट बाहिर निस्किएपछि उनी निर्णायक क्षण हेर्न बाध्य भएका थिए।
म्युनिखको एलियान्ज एरिनामा भावनात्मक उत्सव मनाउन क्रिस्टियानो रोनाल्डो बाध्य भए। खेलको अन्त्यतिर चोटका कारण मैदानबाट बाहिरिए पनि रोनाल्डोले खेल बराबरीमा ल्याउन महत्वपूर्ण गोल गरे। जसले खेललाई अन्ततः पेनाल्टी सुटआउटमा टुंगो लगायो। सन् २०१९ को जितलाई पोर्चुगलले पुनः दोहोर्याएको छ।
विश्वकप आउन अब १२ महिना मात्र बाँकी रहँदा यी दुई टोलीले उत्तर अमेरिकामा अर्को भिडन्तको सपना देख्नेछन्। जर्मनी र फ्रान्समाथिको सेमिफाइनल जितमा पनि प्रदर्शन गरिएको दुवै टोलीको गुणस्तरले उनीहरू त्यो उपाधिका लागि पनि प्रमुख दावेदार हुने संकेत गरेको छ। एजेन्सी
