काठमाडौं, बैशाख २५ । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्रलाई सातौँ पटक म्याद थपका लागि अदालत लगिएको छ ।
दुर्गा प्रसाईं र नवराज सुवेदी नेतृत्वको राजावादी समूहले गत चैत १५ गते काठमाडौंको तीनकुनेमा गरेको हिंसात्मक प्रदर्शनपछि पक्राउ परेका मिश्रलाई जिल्ला अदालत काठमाडौं लगिएको हो ।
राष्ट्रिय प्रजातन्त्र पार्टी राप्रपाका वरिष्ठ उपाध्यक्ष रवीन्द्र मिश्र अझै ५ दिन हिरासतमा रहने भएका छन् ।
यसअघि वैशाख २१ मा काठमाडौं जिल्ला अदालतले छैटौँ पटक म्याद थप गर्दै उनलाई थप ५ दिन हिरासतमा राख्न अनुमति दिएको थियो । उनी गत चैत १५ गते साँझ पक्राउ परेका थिए । राजावादीको प्रदर्शनमा भिडलाई उकासेको आरोपमा उनी पक्राउ परेका थिए ।
उनलाई बिहीबार सातौँ पटक म्याद थपका लागि अदालत लगिएको छ । तीनकुनेमा राजावादी समूहको आन्दोलन हिंसात्मक बन्दा पत्रकार सुरेश रजक र यातायात मजदुर सविन महर्जनको ज्यान गएको थियो ।
त्यसबेला प्रदर्शनकारीहरुले व्यक्तिका निजी घर, व्यवसायिक स्थल र सरकारी कार्यालयमा लुटपाट, तोडफोड र आगजनी गरेका थिए ।
उनीसँगै पक्राउ परेका राप्रपा महामन्त्री धवल शमशेर जबरा भने क्यान्सरको बिरामी भएकाले छुटिसकेका छन् । चैत २८ गते भारतबाट समातिएका दुर्गा प्रसाईं पनि प्रहरीको हिरासतमै छन् ।
