चितवन, बैशाख २४ । चितवनको कालिका नगरपालिकाको एक माध्यमिक विद्यालयले सार्वजनिक बिदाको दिन आज (बुधवार) पढाउने भएको छ । कालिका वडा नं. १ सूर्यपुर चितवनमा रहेको श्री राष्ट्रिय माध्यमिक विद्यालय शमीपुरले सार्वजनिक बिदाको दिनपनि पढाउने भएको हो ।
बागमती प्रदेश सरकारको सरकारी कामकाजको भाषा सबन्धी दिवसको अवसरमा आज सार्वजनिक बिदा दिएको हो तर श्री राष्ट्रिय मा.वि शमीपुरले एक सूचना जारी गरी शिक्षक आन्दोलनका कारण भएको सिकाई क्षतिलाई पूरा गर्न विद्यालय खोल्ने निर्णय भएको जानकारी दिएका छन् ।
विद्यालयका प्राधानाध्यापक धर्मेन्द्र रायमाझीले बागमती प्रदेश सरकारले दिएको सार्वजनिक बिदाको दिन पनि विद्यालय यथावत् संचालन हुने जानकारी दिए ।
नेपाल शिक्षक महासघको आव्हानमा चैत २० गते देखी बैशाख १७ गतेसम्म गरेको २९ दिने शैक्षिक हड्ताललाई मध्यनजर गर्दै विद्यालय खोल्ने निर्णय गरिएको उनले बताए । विद्यालयले गरेको निणयप्रति अभिभावक खुसी भएका छन् ।
