रत्ननगर, बैशाख ११ । रत्ननगर–५, झुवानीका ३० जनालाई नौमती बाजा बजाउने तालिम दिइएको छ ।
सिर्जनशील सामुदायिक सिकाइ केन्द्रको आयोजना एवम् रत्ननगर–५ वडा कार्यालयको आर्थिक सहयोगमा मौलिक लोकबाजा, कला र संस्कृतिको संरक्षणका लागि तालिम सञ्चालन गरिएको हो ।
बिहीबारदेखि सञ्चालित तालिम दुई महिनासम्म सञ्चालन हुने वडाध्यक्ष बालकृष्ण चापागाईंले बताए । संस्कारगत कार्य, सभा, समारोहमा नौमती बाजा बजाउने र पुख्र्यौली नाच्ने कलाकार अभाव हुन थालेपछि तालिम दिइएको वडाध्यक्ष चापागाईंले बताए ।
३० जना सहभागी नौमती बाजा तालिमको जितेन्द्र परियार र रोशन बर्देवाले सहजीकरण गर्नेछन् । उनीहरूले दमाह, ढोलकी, सन्है, ट्याम्को, झ्याली, नरसिङ्गालगायत बाजा बजाउने सीप सिकाउने छन् ।
कार्यक्रममा वडासदस्यद्वय राजेश महतो, ज्ञानु सुनार, नेकपा (माओवादी केन्द्र) का नारायण महतो, झुवानी सामुदायिक पुस्तकालयका अध्यक्ष अनिल अर्याललगायतले शुभकामना मन्तव्य राखेका थिए ।
सिर्जनशील सामुदायिक सिकाइ केन्द्रका अध्यक्ष मीनप्रसाद सापकोटाको अध्यक्षतामा भएको कार्यक्रमको सञ्चालन सीप केन्द्रकी परिचालक रविता महतोले गरेका थिए ।
