बैशाख ११ । स्पेनिस ला लिगामा रियल म्याड्रिडले गेटाफेलाई १-० ले हराएको छ। यो जितसँगै रियलले अङ्क तालिकामा चार अंकको फरक बनाएको छ। रियललाई जित दिलाउने क्रममा आर्डा गुलरले २१ औँ मिनेटमा गोल गरे।
शनिबार हुने कोपा कप फुटबलमा बार्सिलोनासँग फाइनलको तयारीमा रहेको रियलले पहिलो रोजाइको टोलीमा ६ परिवर्तन गरेको थियो।
गएराति नै भएका स्पेनिस ला लिगाका अन्य खेलमा एथलेटिक क्लबले लास पल्मासलाई १-० ले हरायो। सेल्टा भिगोले भिल्लारियललाई ३-० ले तथा डेपोर्टिभो अल्भासले रियल सोसिडाडलाई १-० ले हरायो।
पाँच खेल बाँकी रहँदा बार्सिलोनाको ७६ तथा रियल म्याड्रिडका ७२ अंक छ। एक खेल कम खेलेको एट्लेटिको म्याड्रिड ६३ अङ्कसहित तेस्रो स्थानमा छ। एजेन्सी
