रत्ननगर, बैशाख ६ । रत्ननगर नगरपालिका वडा नं–६ बछौलीमा आयोजित रक्तदान कार्यक्रममा ३६ जनाले रक्तदान गरेका छन् ।
शनिबार नेपाल रेडक्रस सोसाइटी उपशाखा बछौली, रत्ननगर नगरपालिका वडा नं–६ को कार्यालयको आयोजना र राष्ट्रिय दिगो पर्यटन क्लबको सहयोगमा आयोजित कार्यक्रममा सातसहित ३६ जनाले रक्तदान गरेका हुन् ।
कार्यक्रममा वडाध्यक्ष किरण महतोले रगतको अभाव हुन नदिन रक्तदान कार्यक्रमको आयोजना भइरहनुपर्नेमा जोड दिए । ‘रक्तदान नै जीवन दान हो’, उनले भने, ‘रक्तदानमा युवाहरूको सहभागिता महत्वपूर्ण हुन्छ ।’
कार्यक्रममा कार्यपालिका सदस्य एवम् सो वडाका सदस्य बबिताकुमारी चौधरीले युवाहरू परिवर्तनको संवाहक भएकाले सामाजिक काममा लाग्नुपर्ने र रक्तदान कार्यक्रमलाई निरन्तरता दिइनुपर्ने बताइन् ।
कार्यक्रममा रत्ननगर नगरपालिका सामाजिक विकास समितिका संयोजक एवम् रत्ननगरं–५ का वडाध्यक्ष बालकृष्ण चापागाईं, रत्ननगरं–६ का वडा सदस्यद्वय वीरेन्द्र महतो, केशरीमाया सुनार, नेपाल रेडक्रस जिल्ला शाखा चितवनका मन्त्री राममणि खनाललगायतको आतिथ्यता रहेको थियो ।
कार्यक्रम सञ्चालन उपशाखाका सचिव मनोज चौधरीले गरेका थिए भने सभापति सुवास विडारीको अध्यक्षतामा सम्पन्न भएको थियो ।
