रत्ननगर, जेठ १६ । माधवपुर खेलकुद विकास समितिको आयोजनामा भईरहेको माधवपुर गोल्डकप २०८२ अन्तर्गत आज मैत्रीपूर्ण महिला फुटबल प्रतियोगिता हुँदैछ । प्रतियोगितामा रत्न प्रिय क्लब रत्ननगर र साईमन स्पोर्ट्स कालिका भिड्दैछन्। खेल दिउँसो ४ बजे देखि माधवपुर् खेलमैदानमा हुनेछ ।
कुल ८ टिम सहभागी माधवपुर गोल्डकपको फाईनल खेल भोली शनिबार हुँदैछ। फाईनल खेलको पुर्वसन्ध्यामा स्थानियस्तरमा महिला फुटबललाई प्रवर्धन गर्ने उद्देश्यले मैत्रीपूर्ण महिला फुटबल आयोजना गरिएको खेल संयोजक भिम वाईवाले बताए। खेलमा सहभागी हुने दुवै टिम खेलाडी उत्पादन, प्रशिक्षण तथा खेल प्रवर्धनमा प्रयासरत टिम हुन् । आजको खेललाई चितवन प्रिन्ट हाउस रत्ननगरले प्रयोजन गरेको आर्थिक समिति संयोजक मिलन क्षेत्रीले जानकारी दिए ।
गोल्डकपको भोली हुने फाईनल खेलमा एपीएफ र अभिषेक चर्च रजहर भिड्दै छन् । सेमीफाईनलमा एपीएफले न्यू पञ्चदिपलाई १-० ले हराउँदै र अभिषेकले बागमती फुटबल एकेडेमीलाई ट्राईब्रेकरमा ७-६ ले पराजित गर्दै प्रतियोगिताको फाईनलमा प्रवेश गरेका हुन्।
प्रतियोगिता माधवपुर खेलकुद विकास समितिको आयोजना र एक्सपर्ट एजुकेशन एन्ड भिजा सर्भिसेज प्रा।लि।को मुख्य प्रायोजनमा भईरहेको छ ।
