बैशाख २६ । यस सिजनको इण्डियन प्रिमियर लिग (आईपीएल) स्थगित भएको छ । भारतीय क्रिकेट नियन्त्रण बोर्ड बीसीसीआईले यस सिजनका बाँकी खेलहरु अनिश्चित कालका लागि स्थगित गरेको हो ।
बीसीसीआईको बैठकले यस्तो निर्णय गरेको भारतीय टेलिभिजन आज तकले उल्लेख गरेको छ ।
यससँगै आजदेखि आईपीएलका कुनै खेल हुनेछैनन् । भारत र पाकिस्तानबीच तनाव बढ्दै गइरहेका बेला आईपीएल स्थगित गरिएको हो । पाकिस्तानसँग तनाव बढिरहेका बेला आफ्नो पहिलो प्राथमिकता विदेशी खेलाडीहरूलाई घर पठाउनु रहेको बीसीसीआईले जनाएको छ । बीसीसीआईले चाँडै नयाँ मिति घोषणा गर्ने अपेक्षा गरिएको छ ।
आईपीएलमा मे ८ सम्म ५८ खेलहरू भएका थिए । बिहीबार धर्मशालामा आयोजित पञ्जाब किङ्ग्स र दिल्ली क्यापिटल्सबीचको खेल बीचैमा स्थगित भएको थियो ।
