रत्ननगर, चैत ५ । युवा नेतृत्व तथा व्यक्तित्व विकासमा सक्रिय सामाजिक संस्था रत्ननगर जेसीजले यस वर्ष पनि ‘सामूहिक ब्रतबन्ध’ कार्यक्रम आयोजना गर्ने भएको छ । जेसीजले बिहीबार पत्रकार सम्मेलनको आयोजना गरी यही चैत १३ गते सामूहिक ब्रतबन्ध कार्यक्रम सञ्चालन गर्न लागिएको जानकारी दिएको हो ।
रत्ननगर जेसीज वर्ष २०२६ का अध्यक्ष सविन मानन्धरका अनुसार, सन् १९९९ मा स्थापना भएको यो संस्थाले आफ्नो सामाजिक उत्तरदायित्वअन्तर्गत विगतका वर्षहरूमा जस्तै यस वर्ष पनि परम्परा तथा संस्कारको जगेर्ना गर्ने उद्देश्यले यो कार्यक्रमलाई निरन्तरता दिएको छ ।
कार्यक्रम संयोजक सचितराज जोशीले हालसम्म ११ जना बटुकहरूले नाम दर्ता गराइसकेको बताउँदै नाम दर्ताको अन्तिम मिति चैत १० गतेसम्म रहेको जानकारी दिए । उनले कार्यक्रमका लागि दर्ता शुल्क ५ हजार ९ सय ९९ रुपैयाँ तोकिएको र सो शुल्कमा बटुकलाई आवश्यक सम्पूर्ण सामग्री निःशुल्क उपलब्ध गराइने बताए । साथै, सहभागी बटुकका १० देखि १५ जना पाहुनाका लागि निःशुल्क भोजन तथा प्रसादको व्यवस्था गरिएको छ ।
कार्यक्रमलाई सफल बनाउन विभिन्न व्यक्ति तथा संघसंस्थाहरूको सहयोग रहने आयोजकले जनाएको छ । रत्ननगर जेसीज र रत्ननगर जुनियर जेसीजको संयुक्त आयोजनामा हुने यो कार्यक्रमले ब्रतबन्ध जस्तो खर्चिलो संस्कारलाई मितव्ययी बनाउन सहयोग पुग्ने अपेक्षा गरिएको छ ।
ब्रतबन्धसँगै सामूहिक रूपमा मित लगाउने कार्यक्रम पनि गरिने आयोजकले बताएका छन् । पत्रकार सम्मेलनमा पूर्वअध्यक्षहरू अमित कुमार गुप्ता, नरहरी पुरी, रत्ननगर जुनियर जेसिजका पुर्व अध्यक्ष सन्दर्भ खनाल, हालका अध्यक्ष सगुन रेग्मी लगायतको उपस्थिती रहेको थियो ।
